11-noyabr — Ózbekstan kásiplik awqamları kúni múnásibeti menen Qaraqalpaqstan Respublikası Qurılıs hám úy-jay kommunal xojalıǵı ministrliginde "Jańa Ózbekstan — jańa kásiplik awqamları" súreni astında bayram ilajı shólkemlestirildi.
Ilajda Transport, jol hám kapital qurılıs, qurılıs industriyası xızmetkerleri kásiplik awqamı Respublikalıq keńesiniń bas yuristi L.Nishonova hám Ózbekstan Transport, jol hám kapital qurılıs, qurılıs industriyası xızmetkerleri kásiplik awqamı Qaraqalpaqstan Respublikalıq Keńesi bóliminiń baslıǵı G.Palwaniyazova qatnastı.
Ilaj dawamında Ózbekstan Respublikasınıń 2020-jıl 23-noyabrdegi "Ózbekstan kásiplik awqamları kúnin belgilew haqqında"ǵı 648-sanlı Nızamına muwapıq, 11-noyabr sánesi Ózbekstan kásiplik awqamları kúni sıpatında belgilengeni atap ótildi. Miymanlar kásiplik awqamlarınıń jámiyetlik turmıstaǵı ornı, xızmetkerlerdiń miynet huqıqları menen nızamlı máplerin qorǵaw baǵdarındaǵı jumısı haqqında sóz etip, barlıq xızmetkerlerdi bayram menen qızǵın qutlıqladı.
Sonday-aq, Arxitektura hám qurılıs tarawı veteranları keńesiniń aǵzası J.Berdixanov ta ilaj qatnasıwshıların bayram menen qutlıqladı. Ol óziniń shıǵıp sóylegen sózinde mámleketimizde Prezidentimizdiń baslaması menen ámelge asırılıp atırǵan reformalar hám kásiplik awqamlarınıń bul processtegi áhmiyetine ayrıqsha toqtap ótti.
Bayram ilajı dawamında kásiplik awqamlarınıń jumısı, xızmetkerlerdiń sociallıq-ekonomikalıq máplerin qollap-quwatlaw hám miynet jámáátlerinde múnásip sharayatlar jaratıw baǵdarında ámelge asırılıp atırǵan jumıslar boyınsha pikir alısıldı.
Ilaj sońında tarawda nátiyjeli miynet etip kiyatırǵan bir topar kásiplik awqamınıń belsendileri bayram múnásibeti menen húrmet jarlıǵı hám estelik sawǵaları menen sıylıqlandı.