 (6).jpg)
Ózbekstan Respublikası Prezidentiniń 2026-jıl 16-fevraldaǵı “Máhállelerdi rawajlandırıw hám jámiyetti jetilistiriw jılı”nda tiykarǵı baǵdarlar boyınsha reformalar baǵdarlamaları hám “Ózbekstan – 2030” strategiyasın ámelge asırıw boyınsha mámleketlik baǵdarlama haqqındaǵı PP-22-sanlı Pármanınıń 2-bóliminde “Ózbekstan – 2030” strategiyasın “Máhállelerdi rawajlandırıw hám jámiyetti jetilistiriw jılı”nda ámelge asırıwǵa baylanıslı Mámleketlik baǵdarlamanı orınlaw hám onıń orınlanıwın qadaǵalaw boyınsha áhmiyetli wazıypalar belgilengen.
Usı pármanǵa muwapıq, “Rawajlanıw strategiyası” orayı hám “Yuksalish” ulıwma milliy háreketine Mámleketlik baǵdarlamanıń ámelge asırılıwın aymaqlarǵa shıǵıp, jámiyetshiliktiń pikirin esapqa alǵan halda sın kózqarastan úyrenip barıw wazıypası júklengen. Sonday-aq, mámleketlik hákimiyat uyımları, ministrlikler hám uyımlar jáne jergilikli atqarıwshı hákimiyat uyımları tárepinen “Rawajlanıw strategiyası” orayı hám “Yuksalish” háreketiniń Mámleketlik baǵdarlamasınıń orınlanıwın úyreniw baǵdarındaǵı jumısına hár tárepleme járdem beriw belgilengen.
Usı wazıypalardıń orınlanıwın támiyinlew maqsetinde Nókis qalasındaǵı Doslıq úyiniń májilisler zalında “Yuksalish” ulıwma milliy háreketi Qaraqalpaqstan Respublikası aymaqlıq bólimi tárepinen birge islesiwshi shólkemler menen birgelikte “Ózbekstan – 2030” strategiyasınıń 60-maqseti sheńberinde belgilengen kóp kvartiralı turaq jaylardı basqarıw sistemasın rawajlandırıw wazıypalarınıń orınlanıwına baǵıshlanǵan jámiyetlik tıńlaw ótkerildi.
Ilajdı “Yuksalish” ulıwma milliy háreketi Qaraqalpaqstan Respublikası aymaqlıq bóliminiń baslıǵı T.Romanov kiris sóz benen ashıp berdi hám alıp bardı.
Jámiyetlik tıńlawda Qaraqalpaqstan Respublikası Qurılıs hám úy-jay kommunal xojalıǵı ministriniń orınbasarı, ministrliktiń qánigeleri, basqarıw servis kompaniyalarınıń basshıları, puqaralıq jámiyeti institutları hám ǵalaba xabar qurallarınıń wákilleri qatnasıp, kóp kvartiralı turaq jaylardı basqarıw sistemasın jetilistiriw, tarawǵa zamanagóy basqarıw mexanizmlerin engiziw hám bar mashqalalardı saplastırıw máseleleri boyınsha pikir-usınıslar bildirildi.
