Isenim telefonı

+998(61) 223-24-31

Ko'rinish

Shrift o'lchami

logo

Qaraqalpaqstan Respublikası Qurılıs hám úy-jay kommunal xojalıǵı
ministrligi

Sonǵı jańalıqlar

Nókiste zamanagóy qurılıs joybarları menen tanıstırıw press-turı bolıp ótti
19-11-2026

image-news

Mámleketimizde Prezidentimizdiń baslamaları hám turaqlı itibarı sebepli barlıq aymaqlarda dóretiwshilik hám abadanlastırıw jumısları jańa basqıshqa kóterilmekte. Ásirese, Qaraqalpaqstan Respublikasın sociallıq-ekonomikalıq rawajlandırıw, xalıq ushın múnásip turmıs sharayatların jaratıw, zamanagóy infrastrukturanı qáliplestiriw baǵdarında qabıl etilip atırǵan ayrıqsha párman hám qararlar aymaq rawajlanıwınıń bekkem huqıqıy tiykarına aylanbaqta.
Usı itibar hám ǵamqorlıqtıń nátiyjesinde búgin Qaraqalpaqstannıń barlıq aymaqlarında, atap aytqanda, Nókis qalasında qurılıs hám úy-jay kommunal xojalıǵı tarawında keń kólemli reformalar izbe-iz ámelge asırılmaqta. Jańa turaq jay massivleri, zamanagóy sociallıq obyektler, sport imaratları, ıssılıq támiynatı hám injenerlik-kommunikaciya tarmaqlarınıń qurılısı bul ózgerislerdiń ayqın kórinisi bolıp esaplanadı.

Eń áhmiyetlisi, bul dóretiwshilik jumısları xalıqtıń máplerin támiyinlew, qolaylı jasaw ortalıǵın jaratıw hám aymaqtıń sociallıq infrastrukturasın jaqsılawǵa qaratılǵan. Búgin boy tiklep atırǵan hár bir imarat, rekonstrukciyalanıp atırǵan hár bir obyekt erteńgi abadan turmıs hám aymaqtıń rawajlanıwınıń ámeliy kórinisi bolıp esaplanadı.
Mine usınday keń kólemli ózgerisler menen ǵalaba xabar qurallarınıń wákillerin jaqınnan tanıstırıw maqsetinde Nókis qalasında press-tur shólkemlestirildi.
Press-tur dawamında qatnasıwshılar qalada qurılıp hám rekonstrukciyalanıp atırǵan bir qatar áhmiyetli obyektlerdi kózden ótkerip, juwapker qánigelerden joybarlardıń texnikalıq kórsetkishleri, qarjılandırıw dárekleri hám qurılıs jumıslarınıń barısı haqqında tolıq maǵlıwmat aldı.
Dáslep press-tur qatnasıwshıları Nókis qalasınıń 26-kishi rayonında jaylasqan 10-sanlı kóp qabatlı turaq jayda GIZ shólkemi menen birgeliktegi FELICITY II pilot joybarı sheńberinde ámelge asırılıp atırǵan jumıslar menen tanıstı.

Bul bes qabatlı, 60 kvartiradan ibarat turaq jay imaratında energiya nátiyjeliligin arttırıwǵa qaratılǵan kompleksli modernizaciya jumısları alıp barılmaqta. Sonıń ishinde, imarattıń sırtqı diywalları ıssılıqtı saqlawshı arnawlı materiallar menen qaplanıp, turaq jaylarda ıssılıqtı únemlew hám energiya resurslarınan nátiyjeli paydalanıw ushın zárúr sharayatlar jaratılmaqta.
Joybardıń ulıwma bahası 432 215 evronı, yaǵnıy derlik 5 milliard 800 million somdı quraydı. Press-tur qatnasıwshıları shańaraqlarǵa kirip, ámelge asırılǵan jumıslar hám jaratılǵan sharayatlar menen de tikkeley tanıstı.
Bunnan soń qatnasıwshılar Nókis qalasındaǵı "Jas áwlad" mákan puqaralar jıyını, 27-kishi rayon aymaǵında "Nókis kommunal servis" basqarıw servis kompaniyası tárepinen ámelge asırılıp atırǵan jumıslar menen tanıstı.
Bul aymaqta kóp qabatlı turaq jaylar ońlanıp, háwliler abadanlastırılǵan, balalar maydanshaları qurılǵan hám xalıq ushın qolaylı sharayatlar jaratılǵan.

- Biziń kompaniyamız Nókis qalası boyınsha jámi 89, sonnan 27-kishi rayon aymaǵında jaylasqan 44 kóp qabatlı turaq jayǵa kommunallıq xızmet kórsetedi. Usı jılı bul aymaqtaǵı turaq jaylarda 4 milliard somlıq qurılıs-ońlaw jumısları ámelge asırıldı. Bunıń nátiyjesinde "Jas áwlad" mákan puqaralar jıyını aymaǵı jáne de abadanlastırılıp, xalıq ushın qolaylı jasaw sharayatları jaratıldı, – deydi kompaniya direktorı Biyesengaliy Uteniyazov.

Sonday-aq, ilaj qatnasıwshıları Nókis qalasındaǵı 12-sanlı ulıwma orta bilim beriw mektebinde bolıp, Prezidentimizdiń "Qaraqalpaqstan Respublikasında alıp barılıp atırǵan reformalardı bunnan bılay da jedellestiriwge qaratılǵan ilajlar haqqında"ǵı qararı tiykarında ámelge asırılǵan kapital rekonstrukciya jumısların kózden ótkerdi.

Bul obekt sheńberinde mektep ushın qosımsha 660 orınlıq jańa imarat qurılmaqta. Joybardıń ulıwma bahası 8 milliard 195 million somdı quraydı.
Jańa imarattıń paydalanıwǵa tapsırılıwı nátiyjesinde bilimlendiriw mákemesiniń quwatlılıǵı jáne de arttırılıp, oqıwshılar ushın zamanagóy hám qolaylı bilim alıw sharayatları jaratıladı. Obektti jaqın kúnlerde paydalanıwǵa tapsırıw rejelestirilgen.

Ilaj dawamında jurnalistler hám blogerler tárepinen qurılıs jumıslarınıń sapası, belgilengen múddetler, obyektlerdiń paydalanıwǵa tapsırılıw sánesi hám xalıqtıń talapların qanaatlandırıw boyınsha bir qatar sorawlar ortaǵa taslandı. Juwapker qánigeler barlıq sorawlarǵa tolıq juwap berip, jurnalistler ushın obyektler aymaǵında intervyuler shólkemlestirildi.

Bul press-tur ǵalaba xabar qurallarınıń wákillerine aymaqta ámelge asırılıp atırǵan dóretiwshilik jumısları menen tikkeley tanısıw, infrastrukturanı rawajlandırıw boyınsha alıp barılıp atırǵan keń kólemli reformalardıń mánisin tereńirek ańlaw jáne bul haqqında jámiyetshilikke operativ hám qalıs málimleme jetkeriw imkaniyatın berdi.
Búgingi kúnde Nókis qalasında ámelge asırılıp atırǵan bunday iri joybarlar aymaqtıń zamanagóy kelbetin qáliplestiriw, xalıqtıń turmıs sapasın jaqsılaw hám qolaylı qala ortalıǵın jaratıwda úlken áhmiyetke iye bolmaqta.

Qaraqalpaqstan Respublikası Qurılıs hám úy-jay kommunal xojalıǵı ministrligi málimleme xızmeti

 

 

 

 

 

27

Sonǵı jańalanıw: 2026-11-19 11:08:44