.jpg)
Mámleketimizde húrmetli Prezidentimizdiń baslamaları hám turaqlı itibarı sebepli barlıq aymaqlarda reformalar hám abadanlastırıw jumısları jańa basqıshqa kóterilmekte. Ásirese, Qaraqalpaqstan Respublikasın sociallıq-ekonomikalıq rawajlandırıw, xalıq ushın múnásip turmıs sharayatların jaratıw, zamanagóy infrastrukturanı qáliplestiriw baǵdarında qabıl etilip atırǵan ayrıqsha párman hám qararlar aymaq rawajlanıwınıń bekkem huqıqıy tiykarına aylanbaqta.
Usı itibar hám ǵamqorlıqtıń nátiyjesinde búgin Qaraqalpaqstannıń barlıq aymaqlarında, atap aytqanda, Nókis qalasında qurılıs hám úy-jay kommunal xojalıǵı tarawında keń kólemli reformalar izbe-iz ámelge asırılmaqta. Jańa turaq jay massivleri, zamanagóy sociallıq obyektler, sport imaratları hám injenerlik-kommunikaciya tarmaqlarınıń qurılısı bul ózgerislerdiń ayqın kórinisi bolıp esaplanadı.
Eń áhmiyetlisi, bul dóretiwshilik jumısları hár bir puqaranıń kóz aldında, xalıqtıń mápleri jolında ámelge aspaqta. Búgin boy tiklep atırǵan hár bir imarat, rekonstrukciyalanıp atırǵan hár bir obyekt erteńgi abadan turmıs, qolaylı jasaw ortalıǵı hám aymaqtıń rawajlanıwınıń ámeliy kórinisi bolıp esaplanadı. Mine usınday keń kólemli ózgerisler menen ǵalaba xabar qurallarınıń wákillerin jaqınnan tanıstırıw maqsetinde Nókis qalasında press-tur shólkemlestirildi.
Press-tur dawamında qatnasıwshılar Nókis qalasında qurılıp hám rekonstrukciyalanıp atırǵan bir qatar áhmiyetli obyektlerdi kózden ótkerip, juwapker qánigelerden joybarlardıń texnikalıq kórsetkishleri, qarjılandırıw dárekleri hám qurılıs jumıslarınıń páti haqqında tolıq maǵlıwmat aldı.
Dáslep press-tur qatnasıwshıları qalanıń 26-kishi rayonı, “Nawpir” mákan puqaralar jıyını aymaǵında qurılıp atırǵan kóp qabatlı turaq jay kompleksleri menen tanıstı. Bul aymaqta xalıqtı zamanagóy turaq jay menen támiyinlew maqsetinde “Max elit stroy” JShJ tárepinen 135 kvartiralı 3 kóp qabatlı turaq jay imaratı, sonday-aq, “Fayz magnat” JShJ tárepinen 150 kvartiralı kóp qabatlı turaq jaylar qurılısı izbe-iz alıp barılmaqta.
Bunnan soń qatnasıwshılar Nókis qalası “Turan” máhállesi aymaǵında jaylasqan “Turan” stadionında ámelge asırılıp atırǵan rekonstrukciya jumısları menen tanıstı. Ulıwma bahası 101 milliard 846 million somlıq bul joybar juwmaqlanǵannan soń, stadion 12 mıń tamashagóyge mólsherlengen, xalıqaralıq standartlarǵa tolıq juwap beretuǵın zamanagóy sport kompleksine aylanıwı názerde tutılǵan. Házirge shekem joybar ushın 72,5 milliard som qarjı qaratılǵan bolıp, “Nasaf mega stroy” JShJ tárepinen 72 milliard somlıq qurılıs jumısları orınlanǵan.
Press-tur dawamında Ózbekstan Respublikası Prezidentiniń tiyisli qararına muwapıq rekonstrukciyalanıp atırǵan “Nókis aldıńǵı kásip-óner texnikumı” imaratındaǵı jumıslar menen jaqınnan tanıstı. Tender bahası 28,3 milliard somdı quraytuǵın bul obyektke búgingi kúnge shekem 12,9 milliard som qarjı ajıratılǵan bolıp, “USTYURT TRANS” JShJ tárepinen 6,8 milliard somlıq qurılıs-ońlaw jumısları ámelge asırılǵan.
Sonday-aq, Nókis qalasınıń “Jeke terek” máhállesinde “Dek stroy” JShJ tárepinen qurılıp atırǵan 16 qabatlı, 80 kvartiralı zamanagóy turaq jay kompleksi de press-tur qatnasıwshılarında úlken tásir qaldırdı.
Ilaj dawamında jurnalistler hám blogerler tárepinen qurılıs jumıslarınıń sapası, belgilengen múddetler, obektlerdiń paydalanıwǵa tapsırıw sáneleri hám xalıqtıń talapların qanaatlandırıw boyınsha bir qatar sorawlar ortaǵa taslandı. Qánigeler barlıq sorawlarǵa tolıq juwap berip, orınlarda intervyuler shólkemlestirildi.
Bul press-tur ǵalaba xabar qurallarınıń wákillerine aymaqta ámelge asırılıp atırǵan dóretiwshilik jumısları menen tikkeley tanısıw, infrastrukturanı rawajlandırıw boyınsha alıp barılıp atırǵan keń kólemli reformalardıń mánisin tereńirek ańlaw jáne bul haqqında jámiyetshilikke operativ hám haqıyqıy málimleme jetkeriw imkaniyatın berdi.
Búgingi kúnde Nókis qalasında ámelge asırılıp atırǵan bunday iri joybarlar aymaqtıń zamanagóy kelbetin qáliplestiriw, xalıqtıń turmıs sapasın jaqsılaw hám qolaylı qala ortalıǵın jaratıwda úlken áhmiyetke iye bolmaqta.
Qaraqalpaqstan Respublikası Qurılıs hám úy-jay kommunal xojalıǵı ministrligi baspasóz xızmeti
