Onıń ashılıw saltananında Qaraqalpaqstan Respublikası Joqarǵı Keńesiniń Baslıǵı Murat Kamalov shıǵıp sóylep, Prezidentimizdiń basshılıǵında elimizde denetárbiya hám sporttı rawajlandırıw boyınsha ámelge asırılıp atırǵan jumıslarǵa toqtap ótti. Jıynalǵanlardı jańa sport maydanshasınıń ashılıwı menen qutlıqladı.
Atap ótilgenindey, mini futbol boyınsha Ózbekstan Respublikası Mámleketlik qáwipsizlik xızmeti baslıǵınıń kubogı ushın ótkerilgen jarısta Nókis rayonınıń «Aqmanǵıt» komandası 14 komanda arasında tórtinshi orındı iyelep, «Street Workout» may danshasınıń qurılısı boyınsha sertifikatqa iye bolǵan edi.
Ulıwma bahası 1 milliard 300 million sum bolǵan qurılıs jumısları «MAX ELIT SROY» juwapkershiligi sheklengen jámiyeti qurılısshıları tárepinen qısqa múddette qurıp pitkerildi. Jańa sport maydashasınıń paydalanıwǵa tapsırılıwı rayon jasları arasında denetárbiya hám sporttı rawajlandırıw, olardı sportqa tartıwda ayrıqsha áhmiyetke iye boldı.
Ilaj qatnasıwshıları jas sportshılar arasında ótkerilgen jarıstı tamasha etti.
derek: kknews.uz
