Mámleketimiz Prezidenti tárepinen «Jańa Ózbekstan» massivi tiykarında Kegeyli rayonında zamanagóy turaq-jay massivi qurılısı belgilengenligi ásirese, rayon xalqın, quwantpaqta. Sonlıqtan «Jańa Ózbekstan» massivi ushın «Aqtuba» awıl puqaralar jıyını aymaǵınan 10,8 gektar jer maydanı tańlap alındı. Turaq-jay massivinde 2022-2024-jıllar ishinde hár biri 30 kvartiradan ibarat 20 kóp qabatlı turaq-jay qurıw rejelestirilgen. Sonday-aq, massivte sociallıq taraw obektlerinen 320 orınlı 1 mektep imaratı, 180 orınlı 1 balalar baqshası, 50 orınlı 1 medicina poliklinikası, 3 sawda dúkanı imaratın qurıw boyınsha qurılıs jumısları jedel pátlerde alıp barılmaqta. Massivtiń injenerlik kommunikaciyalar menen támiyinlew ushın 335 metr elektr tarmaǵı, 380 metr ishimlik suw tarmaǵı, 150 metr tábiyǵıy gaz hám 200 metr baylanıs tarmaqları tartıldı. Kegeyli rayonında ɵtkerilgen media-tur dawamında qatnasıwshılar jańa massivte alıp barılıp atırǵan qurılıs jumıslarınıń barısı menen tanıstı.
