Qaraqalpaqstan Respublikası Qurılıs hám úy-jay kommunal xojalıǵı ministrligi tárepinen qurılıs hám úy-jay kommunal xojalıǵı tarawında ámelge asırılıp atırǵan reformalar hám jańalıqlar menen student-jaslardı tanıstırıw maqsetinde dógerek sáwbeti ótkerildi.
Qaraqalpaqstan Respublikası Qurılıs hám úy-jay kommunal xojalıǵı imaratında joqarı oqıw orınlarınıń studentleri, jas qánigeler hám ǴXQ wákilleriniń qatnasıwında dógerek sáwbeti bolıp ótti. Ilajdıń tiykarǵı maqseti – student-jaslardı tarawǵa tartıw, olardıń baslamaları hám ámeliy tájiriybelerin rawajlandırıw, sonday-aq, tarawǵa baylanıslı jańalıqlar hám imkaniyatlar menen tanıstırıw edi.
Ilajda Qaraqalpaq mámleketlik universitetiniń Qurılıs fakulteti studentleri de qatnastı.
Ilajdı moderator kiris sóz benen ashıp, qatnasıwshılardı ilajdıń maqseti menen tanıstırdı. Keyin qánigeler tarawdıń áhmiyetli jańalıqları, ámelge asırılıp atırǵan reformalar, jaslar ushın imkaniyatlar hám ámeliyat máseleleri boyınsha bayanat jasadı.
Atap aytqanda, Respublikamızda 2026-jılı qurılıs hám úy-jay kommunal xojalıǵı tarawında keń kólemli joybarlardı ámelge asırıw rejelestirilgen. Sonıń ishinde, zamanagóy imarat hám obyektler, kóp qabatlı turaq jaylar, stadionlar, mektepler, emlewxanalar hám sport kompleksleriniń qurılısı belgilengen.
Sonday-aq, 2026-jılı Qaraqalpaqstan Respublikasında jańa sociallıq obyektler – mektepler, mektepke shekemgi bilimlendiriw mákemeleri, jollar, emlewxanalar hám basqa da infrastruktura obyektlerin qurıw rejelestirilgen. Bul joybarlar Ózbekstan Respublikası Prezidentiniń investiciyalıq baǵdarlamasına (PQ-393) kirgizilgen bolıp, olardıń sheńberinde keń kólemli kapital qurılıs jumısları ámelge asırıladı.
Maǵlıwmatlarǵa bola, aymaqlar kesiminde jámi 100 joybardı ámelge asırıw ushın 1 trillion 26 milliard som qarjı qaratılıwı názerde tutılǵan. Bul joybarlar arasında eń joqarı kórsetkish Nókis qalasına tuwra kelip, bul jerde 22 joybardı ámelge asırıw rejelestirilgen.
Dógerek sáwbetinde student-jaslar óz tájiriybeleri hám baslamaları menen ortaqlasıp, ámeliyattaǵı jetiskenlikleri haqqında pikir bildirdi. Bunnan soń soraw-juwap sessiyası ótkerilip, studentler, jas qánigeler hám ǴXQ wákilleri tárepinen tarawǵa baylanıslı qızıqtırǵan sorawlarǵa tolıq juwap berildi.
Ilajdıń juwmaqlawshı bóliminde ǴXQ wákilleri menen sóylesiw shólkemlestirilip, intervyuler hám pikir alısıw processi bolıp ótti. Moderator ilaj juwmaǵında eń áhmiyetli pikir hám usınıslardı atap ótip, barlıq qatnasıwshılarǵa minnetdarshılıq bildirdi.
Qaraqalpaqstan Respublikası Qurılıs hám úy-jay kommunal xojalıǵı ministrligi baspasóz xızmeti
