GIZdiń "Ózbekstanda kásiplik bilimlendiriw sistemasın reformalaw hám modernizaciyalaw processin qollap-quwatlaw (TexVET II)" hám "Turaqlı ekonomikalıq rawajlanıwdı xoshametlew (NaWi)" joybarları sheńberinde Qaraqalpaqstan Respublikasına tanısıw missiyası shólkemlestirildi.
Sapardan gózlengen tiykarǵı maqset dual kásiplik bilimlendiriwdi engiziwge qızıǵıwshılıq bildirgen hám bul sistemanı ámeliyatqa engizip atırǵan jańa birge islesiwshiler menen tájiriybe almasıw, sonday-aq, kásip-óner bilimlendiriwi mákemeleriniń jumısı menen jaqınnan tanısıwdan ibarat boldı.
Missiya sheńberinde delegaciya Qaraqalpaqstan Respublikası Qurılıs hám úy-jay kommunal xojalıǵı ministrliginde de bolıp, ministrlik qánigeleri menen qurılıs tarawı ushın maman kadrlar tayarlaw, dual bilimlendiriw sistemasın rawajlandırıw, bilimlendiriw mákemeleri hám óndiris kárxanaları arasındaǵı birge islesiwdi bekkemlew máseleleri boyınsha ashıqtan-ashıq sóylesiw ótkerdi.
Ushırasıw juwmaǵında óz-ara birge islesiwdi bunnan bılay da keńeytiw, dual bilimlendiriwdi rawajlandırıw boyınsha perspektivadaǵı rejeler hám ámelge asırılatuǵın qospa baslamalar boyınsha pikir alısılıp, keleshektegi birge islesiwdiń tiykarǵı baǵdarları belgilep alındı.
